Deputetja nga radhët e Partisë Demokratike të Kosovës, Ariana Musliu- Shoshi ka vizituar sot Likoshanin e Qirezin për të kujtuar 25 vjetorin e masakrës dhe betejës së UÇK-së me forcat serbe.

Përmes një shkrimi në Facebook, ajo tha se në këto fshatra të Drenicës, policia serbe, vrau gra, pleq, burra dhe të rinj të pafajshëm, të paarmatosur e të pambrojtur në shtëpitë e tyre.

“Sot bëhen 25 vite nga masakra dhe beteja në dy fshatrat e Drenicës, Likoshan dhe Qirez. Policia serbe, vrau gra, pleq, burra dhe të rinj të pafajshëm, të paarmatosur e të pambrojtur në shtëpitë e tyre”, tha deputetja.

“Këto vrasje do të bënin jehonë në gjithë Kosovën dhe në çdo vend ku kishte shqiptarë, se fati i ynë do të vulosej vetëm nga bashkimi i të gjithëve kundër pushtetit okupues serb në Kosovë”, u shpreh Musliu- Shoshi.

Deputetja tha se i përjetshëm do të qëndrojë kujtimi dhe nderimi për të rënët.

“Populli shqiptar sakrifikues, lufta dhe rezistenca e UÇK-së dhe përkrahja e fuqishme ndërkombëtare, do të kulmonin me lirinë dhe pavarësinë e Kosovës. Vlera sublime për të cilat u flijuan bashkëqytetarët tanë, të cilët sot i nderuam me homazhe. I përjetshëm do të qëndrojë kujtimi dhe nderimi për të rënët.
Lavdi jetës dhe veprës së tyre”. /arbresh.info/