Premier League ka siguruar një vend të pestë për sezonin e ardhshëm të UEFA Champions League, falë performancave të shkëlqyera të klubeve të saj në kompeticionet europiane këtë sezon.

Ky vend shtesë u konfirmua pas fitores 1-0 të Arsenal ndaj Sportingut të Lisbonës në ndeshjen e parë të çerekfinaleve të Champions League, duke siguruar që Anglia do të përfundojë ndër dy ligat kryesore sipas renditjes së koeficientit UEFA.

Kjo është hera e dytë radhazi që Premier League fiton një vend shtesë, duke bërë që këtë sezon Liverpooli, Arsenali, Manchester City, Chelsea dhe Newcastle të marrin pjesë në Champions League, ndërsa Tottenhami u kualifikua si një ekip i gjashtë pas triumfit në Europa League.

Aktualisht, Liverpool mban vendin e pestë me 49 pikë, vetëm një më shumë se Chelsea në vendin e gjashtë, ndërsa Brentfordi dhe Evertoni janë vetëm tri pikë pas tyre.