Komisionerja për Zgjerim, Marta Kos, ka deklaruar se Shqipëria ka shënuar një hap të rëndësishëm për procesin e anëtarësimit në Bashkimin Evropian.

Këtë deklaratë, ajo e ka dhënë pas takimit të 8-të ndërqeveritar për anëtarësimin e Shqipërisë në familjen evropiane, duke vlerësuar lartë reformat e ndërmarra nga shteti shqiptar.

“Pas Malit të Zi, Shqipëria është vendi i dytë që ka arritur të plotësojë piketat e ndërmjetme. Puna juaj e 10 viteve ka rezultuar e suksesshme.”, ka thënë Kos.

Ajo ka veçuar procesin e vettingut dhe ngritjen e institucioneve të reja të drejtësisë, duke theksuar rolin e SPAK.

“Hapa përparimi janë hedhur që shqiptarët të kenë një shtet të rregullt. Kemi parë ngritjen e SPAK, që është institucioni flamurtar në Shqipëria, që mund të japë rezultate dhe mund të bëhet institucioni i besueshëm. Fuqia e anëtarësimit të BE duhet të ndjehet nga qytetarët e BE-së. Duke arritur këtë gur kilometrik, arritja e sotme çel një fazë të re për integrimin dhe bën të mundur që Shqipëria të ecë drejt rrugës për mbylljen e grupkapitujve.”, ka deklaruar ajo.

Kos ka shtuar se do të vazhdojnë ta mbështesin punën e Shqipërisë për mbylljen e negociatave deri në vitin 2027.