Kandidati i Lëvizjes Vetëvendosje për kryetar të Prishtinës, Hajrulla Çeku, ka theksuar rëndësinë e mbështetjes së sektorit të ICT-së dhe industrisë kreative, duke i cilësuar si shtylla kyçe të zhvillimit ekonomik të kryeqytetit.

Në një postim, Çeku ka përmendur kompaninë ndërkombëtare Teleperformance, e cila operon në Kosovë që nga viti 2017 dhe tashmë është një nga punëdhënësit më të mëdhenj të sektorit në Prishtinë.

Ai ka vlerësuar se suksesi i kësaj kompanie, ku tashmë edhe pozitat menaxheriale udhëhiqen nga profesionistë kosovarë që menaxhojnë ekipe në Gjermani, dëshmon për potencialin dhe kualitetin e të rinjve në vend.

“Komuna duhet të mbështesë kompani të tilla, sepse synimi është i qartë: papunësia nën 5%, dhe një rini që njihet jo si fuqi punëtore e lirë, por kualitative dhe e adaptueshme”, ka deklaruar Çeku.

Ai shtoi se e ardhmja e Prishtinës është digjitalja, inovacioni dhe shërbimet teknologjike që eksportohen, duke bërë thirrje për një përkushtim të përbashkët për një Prishtinë që punëson dhe zhvillohet./Arbresh.info