Policia Kombëtare e Ukrainës ka njoftuar se trupi i pajetë i një ushtaraku 27-vjeçar është gjetur në një apartament me qira në qytetin Zhytomyr, në pjesën qendrore-veriore të vendit.

Sipas hetuesve, në vendngjarje janë gjetur disa enë me mbetje të një substance pluhur, ndërsa rrethanat e rastit kanë ngritur dyshime për një vepër penale të mundshme.

Autoritetet ukrainase bëjnë të ditur se në hetimet fillestare është përmendur edhe komunikimi i dyshuar i një të dyshuare me një përfaqësues të shërbimeve speciale ruse.

Sipas Policisë, dyshohet se ajo ka marrë udhëzime përmes një kanali të jashtëm, duke përfshirë marrjen e një pakete me substancë të dyshuar narkotike dhe organizimin e një takimi me ushtarakun. Më pas, sipas versionit hetimor, viktima ka humbur ndjenjat në apartament dhe e dyshuara është larguar nga vendi i ngjarjes.

Autoritetet kanë bërë të ditur se rasti po trajtohet si hetim paraprak dhe po vazhdojnë veprimet për zbardhjen e plotë të rrethanave.