Kreu i Partisë Demokratike, Lulzim Basha, ishte i ftuar në emisionin “Opinion” përballë një paneli gazetarësh ku foli për alternativën me të cilën opozita shkon përballë shqiptarëve në zgjedhjet e 25 prillit.

Ai tha se do bëjë të mundur anëtarësimin e vendit në Bashkimin Evropian, ndërsa brenda vitit të parë të qeverisjes së tij do nisë negociatat e integrimit.

Basha gjithashtu nënvizoi se pjesë e programit të tij është edhe ulja e çmimit të naftës me të paktën 24 lekë për litër si dhe ulja e taksave.

Ai tha se vetëm taksa e sheshtë 9% dhe ulja e sigurimeve shoqërore në 18% do të çlirojë një energji ekonomike të madhe dhe që sot është ndrydhur.

Basha i ktheu përgjigje edhe pyetjes se ku do i gjejë lekët për të realizuar reformat e premtuara ndërsa ul taksat, duke theksuar se pjesa kryesore do të sigurohet duke luftuar keqmenaxhimin e fondeve publike.

Kryedemokrati premtoi gjithashtu se me ardhjen e tij në qeverisje do të rishikohen të gjitha vendimet që ka marrë kuvendi në dy vitet e fundit, që nga moment që opozita u largua prej tij.

Basha, ndryshe nga kundërshtari i tij politikë, tha se është i gatshëm të ballafaqohet me të në një debat televiziv. Ai tha se kryeministri Rama nuk ka asgjë për t’u ofruar shqiptarëve dhe në fushatë është bërë satelit i kryetarit të opozitës.