Tifozeria e Kombëtares së Kosovës, ‘Dardanët’, kanë bërë thirrje të veçantë për talentin e ri të futbollit, Leon Avdullahu, duke e ftuar të vesh fanellën dardane.

Në një postim në faqen e tyre, ‘Dardanët’ i janë drejtuar lojtarit me fjalë plot emocion.

“LEON, Kosova është vendi i gjyshit e babit tënd, ti je shqiponja që Kombin e gëzon. Veç në Kosovë nuk je i huaj”.

‘Dardanët’ kanë theksuar se nuk kanë bërë më parë thirrje të drejtpërdrejta për ndonjë futbollist, por këtë herë e shohin të domosdoshme, pasi kombëtare të tjera po e kërkojnë lojtarin që ata e konsiderojnë si “yllin e Kosovës”.

“Leon do të thotë Luan. E luani është i fortë vetëm tek kombëtarja që e përfaqëson. Këtu do të jesh gjithmonë luan, mbret. Pas teje do ta kesh gjithë tufën e Dardanëve për çdo lëvizje, edhe kur nuk do të kesh momente të mira”, shkruan mesazhi.

Në fund, thirrja e tyre është e qartë dhe e fuqishme.

“Leon, mos harro: Këtu vlen. Këtu çmohesh. Këtu do të të duan pa interes.”/rtk