Vlera e lirës turke bëri një kthesë masive mbrëmjen e së hënës, pasi presidenti Erdogan prezantoi një seri hapash që sipas tij do të lehtësojnë barrën e valutës së rraskapitur turke dhe u zotua se do të vazhdojë me politikën e normave të ulëta të interesit që çuan në rënien e saj.

Lira, që kishte rënë me mbi 11 për qind në kuotën 18.4 kundrejt dollarit, u përforcua me 10 për qind pas njoftimit të presidentit, duke u këmbyer me 14.90 dollarë.

Rikuperimi vjen teksa valuta amerikane u gjend nën presion pasi të ardhurat e Departamentit të Thesarit ranë pas një goditjeje ndaj planit të shpenzimeve të demokratëve në Uashington dhe shqetësimeve për përhapjen e Omicron.

Duke folur pas një mbledhjeje të kabinetit, Erdogan tha se masat e marra do të bëjnë të mundur që qytetarët të mos kenë nevojë të këmbejnë valutën vendase në të huaj.

“Nga sot e tutje asnjë nga qytetarët tanë nuk do të ndjejë nevojën për të konvertuar depozitën e tij me lira turke në valutë të huaj. Me shkurtimin e normave të interesit, ne do të shohim inflacionin të bjerë në muajt e ardhshëm”, tha Recep Tayyip Erdogan, president i Turqisë.

Erdogan i bëri gjithashtu thirrje kujtdo që gëzon të ardhura apo akses në financë të investojë dhe u zotua se do të ndihmojë eksportuesit dhe pensionistët.

Nga ana tjetër, ekonomistët e kanë cilësuar modelin e normave të ulëta të interesit një lëvizje të pamenduar dhe kanë deklaruar se inflacioni mund të shkojë mbi 30 për qind gjatë vitit të ardhshëm./euronews.al/