Presidenti amerikan, Donald Trump, ka shuar zërat për një samit të menjëhershëm dhe spektakolar për paqen, duke vendosur një vijë të kuqe të qartë diplomatike. Përmes një reagimi në platformën e tij “Truth Social” mbrëmjen e sotme, kreu i Shtëpisë së Bardhë ka sqaruar se takimi me liderët e palëve në konflikt do të jetë akti final dhe jo fillimi i procesit.

Mesazhi i drejtpërdrejtë

Duke iu përgjigjur indirekt gatishmërisë së shprehur më herët nga presidenti ukrainas Zelensky, Trump shkroi: “Pres me padurim të takohem me Zelenskyn dhe Putinin, por vetëm kur marrëveshja për t’i dhënë fund kësaj lufte të jetë përfundimtare ose në fazat e saj përfundimtare.”

Strategjia amerikane

Ky qëndrim konfirmon se Uashingtoni po ndjek një qasje pragmatiste: fillimisht po punohet me detajet teknike dhe “delikate” (siç konfirmoi më herët zëdhënësja e Shtëpisë së Bardhë) përmes të dërguarve specialë dhe ministrave, dhe vetëm kur dokumenti i paqes të jetë gati për firmë, do të ketë një takim të nivelit të lartë.

Me këtë deklaratë, Trump hedh poshtë mundësinë e një takimi vetëm për “show” mediatik, duke kërkuar garanci konkrete se lufta ka marrë fund përpara se të ulet në tryezë me homologët rusë dhe ukrainas./rtsh.al/