Kryeqytetasit nuk i janë bindur masave për parandalimin e koronavirusit duke thyer vetëizolimin dhe duke lëvizur në rrugët e Tiranës si një ditë e zakonshme pushimi.

Nuk mungojnë as grumbullimet, ndonëse rreptësisht të ndaluara. Nisur nga kjo situatë e paprecedentë, Kryeministri Rama ka vendosur të përshkallëzojë më tej masat dhe penalitetet ndaj qytetarëve të papërgjegjshëm, duke ndaluar lëvizjet e këmbësorëve.

“Nga nesër dalja e këmbësorëve do të kufizohet vetëm në fashat orare 06.00 – 10.00 dhe 16.00 – 18.00. Nga nesër do të ndalohet dalja në këmbë rrugëve me persona të tjerë në krah. Shkelja e këtyre rregullave do të ndëshkohet me gjobë 10.000 lekë për çdo person dhe shkelësit nuk do të marrin asnjë ndihmë shtetërore nga paketa financiare e solidaritetit në kushtet e kësaj lufte. Boll një pakicë e vogël fare individësh të papërgjegjshëm nuk mund të sabotojnë sakrificën e një populli të tërë, duke rrezikuar jetën e tyre dhe të njerëzve të tjerë!”

Këmbësorëve që do të shkelin masat e reja të lëvizjes dhe që figurojnë në borderotë e shtetit si punonjës të administratës qendrore apo vendore, do t’u mbahet gjithashtu rroga për 3 muaj dhe në rast përsëritjeje do të largohen përfundimisht nga puna.

Por kjo nuk është e vetmja masë e ndërmarrë nga qeveria në aktin normativ. Nga e enjtja të gjithë punonjësit e administratës publike nuk do të lejohen të lëvizin me automjete për të shkuar në zyrë, në të kundërt do të ndëshkohen me mbajtjen e rrogës për 3 muaj dhe në rast përsëritje edhe me largimin përfundimtar nga puna.

“Nga nesër të gjithë punonjësit e institucioneve të varësisë së administratës qëndrore apo vendore që e kanë punën në zyrë nuk do të përdorin makinë për të shkuar në punë. Shkelja e këtyre masave, të cilat do të përfshihen nesër, së bashku me masat e reja për lëvizjen e këmbësorëve në aktin normativ do të ndëshkohet me mbajtjen e rrogës për 3 muaj dhe në rast përsëritje me largimin përfundimtar nga puna! Sot punonjësi i shtetit që shkel rregullat e luftës në mënyrë të përsëritur, nuk është një kundravajtës si të tjerët, po një dezertor në kuptimin e plotë të fjalës!”

Rama thotë se përjashtim nga ky rregull bëjnë vetëm punonjësit e Ministrisë së Shëndetësisë, asaj të Mbrojtjes, Ministrisë së Financave apo të prefekturave e bashkive, që janë të përfshirë në listën prioritare me firmën e titullarit, për të garantuar zhvillimin e luftës sipas planit, në aspektin shëndetësor dhe humanitar.

Të gjithë këta titullarë duhet të çojnë tek ministri apo kryetari i bashkisë, listën e arsyetuar të punonjësve që e kanë të domosdoshme lëvizjen me makinë, emër për emër dhe të gjitha listat duhet t’i vihen në dispozicion jo më vonë se ora 23:00 Policisë së Shtetit./tvklan