FC Barcelona po vazhdon të analizojë me kujdes tregun e transferimeve, teksa synon të përforcohet në tri pozita kyçe: një mbrojtës qendror, një sulmues krahu dhe një “9” klasik.

Drejtuesit katalanas po monitorojnë si talentet në rritje, ashtu edhe lojtarët që janë afër përfundimit të kontratave, por jo të gjithë emrat që qarkullojnë në media janë prioritet real për klubin.

Një nga emrat më të përfolur kohët e fundit është Bernardo Silva, i cili pritet të largohet nga Manchester City.

Megjithatë, pavarësisht cilësisë së tij të padiskutueshme, në “Camp Nou” vlerësohet se pozita e tij natyrale – krahu i djathtë me prirje për të hyrë në qendër – është tashmë e mbuluar nga talenti i ri Lamine Yamal. Për këtë arsye, transferimi i tij nuk konsiderohet prioritet.

Në të njëjtën linjë është edhe rasti i Rafael Leão. Sulmuesi i Milanit vlerësohet për fuqinë dhe cilësinë në sulm, por në Barcelonë ka dyshime për kontributin e tij në fazën defensive dhe presionin ndaj kundërshtarëve – elemente që konsiderohen thelbësore në filozofinë e trajnerit Hansi Flick.

Ndërkohë, një profil që pëlqehet për intensitetin e lartë është Víctor Muñoz i Osasunas.

Megjithatë, situata e tij është e komplikuar pasi Real Madrid ka opsion rikthimi për vetëm 8 milionë euro, ndërsa klauzola e tij arrin në 40 milionë euro. Për më tepër, Barcelona aktualisht po kërkon lojtarë më të konsoliduar dhe me eksperiencë, në përputhje me kërkesën e Flick për liderë në skuadër.

Një tjetër emër i analizuar është Pedro Neto i Chelseas, por edhe ai nuk është në listën prioritare për momentin.

Sa i përket spekulimeve për talentin e ri Eduardo Conceição nga Palmeiras, burime pranë klubit katalanas i kanë mohuar kategorikisht kontaktet, duke theksuar se emri i Barcelonës po përdoret vetëm për të rritur vlerën e lojtarit në treg./Arbresh.info