Ylli Manjani vijon të shprehë hapur kritikat e tij ndaj Edi Ramës si politikan. Sipas ish-ministrit të Drejtësisë, kreu i qeverisë ka defekte serioze, të cilat i shfaq shpesh me aleatët e tij.

“Marrëdhënia e Ramës me aleatët me të tjerët, është e frikshme. Të mendosh që do shkonin në zgjedhje vetëm vetëm se kryeministri nuk dialogonte, kjo nuk është normale. Kryeministri është i rrezikshëm në këtë filozofi”, – u shpreh Manjani i ftuar në “E Diell”.

Për Manjanin, Ilir Meta si President ishte një vendim i mirë.

“Ilir Meta është talent ekzekutiv, në trurin e Metës është “action”, nuk e bën dot plakun mere në zyrë. Por mund të jetë një nga presidentët më ndryshe”, theksoi ish-ministri që tashmë i është përkushtuar profesionit të tij si jurist”.

Manjani shprehet se mund të kishte kontribuar në parlamentin e ardhshëm, edhe pse thekson faktin që nuk ka qenë deputet asnjëherë në karrierën e tij politike.

Manjani deklaroi se e respekton vendimin e LSI-së për të mos e listuar si kandidat për deputet.

“Nuk kam qenë asnjëherë deputet, mund të kisha kontribuar në parlamentin e ardhshëm. Është vendim i partisë, e respektoj, unë nuk jam larguar nga partia dhe nga politika”.