Kuvendi i Polonisë nesër do ta ratifikojë Protokollin për anëtarësimin e Republikës së Maqedonisë në NATO.

Këtë sot e deklaroi ambasadori polak në vend Vojcieh Ticilinjski, i cili mori pjesë në diskutimin diplomatik me ambasadorët e vendeve anëtare të NATO-s me temë “Rruga deri në Bruksel”, në të cilin kanë folur edhe kryeministri Zoran Zaev dhe ministrja e Mbrojtjes Radmilla Shekerinska.

“Kjo është rastësi sepse kjo ndodh pikërisht këto ditë, dhe donim ta ftonim kryetarin e Kuvendit Talat Xhaferi të marrë pjesë në këtë ngjarje, por për fat të keq ai për momentin është jashtë vendit, por në votim do të marrë pjesë zëvendëskryetari Vesel Memedi”, tha Ticinjski.

Sipas tij, aderimi në NATO nuk është i lehtë, por një proces kompleks, duhet të merren vendime të rënda, dhe nga aspekti politik, por më e rëndësishme është ajo që do ta marrim si rezultat final.

Diskutimi diplomatik, në suaza të NATO-s këtë javë, e organizojnë Ministria e Mbrojtjes, Këshilli Euro Altlantik (ATA) dhe Ambasada e Republikës së Sllovenisë.