Nënkryetari i Bashkimit Demokratik për Integrim (BDI), Arbër Ademi, ka njoftuar se kjo parti ka siguruar fitore bindëse që në raundin e parë të zgjedhjeve lokale në Komunën e Gostivarit, ndërsa në Kërçovë dhe Strugë kandidatët e saj do të garojnë në balotazh.

Në një deklaratë për media, Ademi theksoi se rezultati në Gostivar është një fitore e thellë për BDI-në dhe për kandidatin e saj.

“Në Komunën e Gostivarit fitojmë pa balotazh, që në raundin e parë, me një diferencë të thellë 6 me 1. Që sonte, kryetar i ardhshëm i Komunës së Gostivarit është kandidati i BDI-së, Valbon Limani”, deklaroi Ademi.

Ai shtoi se kandidatët e kësaj partie në Kërçovë dhe Strugë do të përballen në raundin e dytë të zgjedhjeve lokale.

“Në dy komuna të tjera, të Kërçovës dhe Strugës, kandidatët tanë shkojnë në balotazh”, tha më tej Ademi, duke nënvizuar se rezultatet e deritashme tregojnë mbështetje të gjerë për Bashkimin Demokratik për Integrim në mbarë vendin./rtk