Mbrëmë në media është raportuar se kryeministri i Kosovës, Albin Kurti ka angazhuar 38 këshilltarë.

Këtë lajmë sot e ka hedhur poshtë zëdhënësi i Qeverisë, Përparim Kryeziu duke theksuar se numri total i këshilltarëve të Kurtit është 25, përcjell Arbresh.info.

“Ky raportim i mbrëmshëm nuk është i saktë dhe atë në mënyrë të dyfishtë. Së pari, kryeministri Kurti nuk i ka të angazhuar 38 këshilltarë. Numri total i këshilltarëve, përfshirë ata të jashtëm, është 25. Prej tyre 8, duke qenë të jashtëm, nuk paguhen nga buxheti i Shtetit”, ka shkruar Kryeziu në rrjetin social Facebook.

Tuje, ai shtoi se numrin më të lartë të këshilltarëve e ka pasur ish-kryeministri, Ramush Haradinaj me gjithësej 33 të tillë.

“Së dyti, kryeministri Kurti nuk ka numër më të lartë të këshilltarëve se ç’kishte ish-kryeministri Haradinaj. Numri total i këshilltarëve të emëruar, përfshirë ata të jashtëm, të ish-kryeministrit Haradinaj sipas të dhënave të muajit janar 2020 ishte 33”, u shpreh zëdhënësi i Qeverisë së Kosovës.

Në fund, Kryeziu bëri të ditur se numri 38 i raportuar mbrëmë përfaqëson numrin total të stafit të emëruar në kryeministri.

“Për informim, kabineti i Kryeministrit përbëhet nga këshilltarët politikë, nëpunësit e kabinetit dhe këshilltarët e jashtëm. Ata së bashku përbëjnë stafin e Kryeministrit. Numri 38 i raportuar mbrëmë përfaqëson numrin total të stafit të emëruar të Kryeministrit: 25 këshilltarë, 10 nëpunës, ku bëjnë pjesë zyrtaret ekzekutive dhe administrative, fotografi, zyrtarët e protokollit, asistentët—pra që nuk janë këshilltarë—, dhe të 3 të tjerë të emëruar të kryeministrit, ku përfshihen Kryesuesi i Komisionit Qeveritare për Personat e Zhdukur/Kryetari i delegacionit të Kosovës për bisedime për çështjen e Personave të Zhdukur, koordinatori i Sekretariatit Koordinues Ndërqeveritar Kosovë -Shqipëri, dhe koordinatorja për funksionalizimin e Fondit Sovran, të cilët kanë mandate të veçanta”, tha në fund Kryeziu./Arbresh.info