Mbrojtësi i Kombëtares së Kosovës, Lumbardh Dellova, mund të jetë pranë një hapi të rëndësishëm në karrierën e tij, pasi emri i tij po lidhet me një transferim të mundshëm në kampionatin ukrainas.

Sipas raportimeve të mediumit bullgar “Gol.bg”, interesim konkret për 27-vjeçarin ka shfaqur gjiganti ukrainas Dinamo Kiev, një nga klubet më të suksesshme në vend. Raportohet se drejtuesit e klubit janë të gatshëm të investojnë rreth 950 mijë euro për të siguruar shërbimet e qendërmbrojtësit kosovar.

Dinamo Kiev po synon të forcojë repartin defensiv para fillimit të sezonit të ri, ndërsa Dellova shihet si një profil që mund të sjellë stabilitet dhe cilësi në mbrojtje.

Paraqitjet e tij të fundit me CSKA Sofia kanë tërhequr vëmendjen e skautëve të klubit ukrainas, duke shtuar interesimin për një transferim të mundshëm.

Aktualisht, Dellova është pjesë e CSKA Sofias, ku u transferua në vitin 2024 nga Ballkani. Ai ka kontratë me klubin bullgar deri në verën e vitit 2027, çka i jep ekipit një pozicion të fortë në rast negociatash për një marrëveshje të re./telegrafi