Katër persona janë arrestuar nga Policia e Kosovës në Podujevë nën dyshimin për përfshirje në tentim vrasje, armëmbajtje pa leje dhe pjesëmarrje në rrahje.

Sipas raportit 24-orësh të policisë, ngjarja ka ndodhur dje  rreth orës 14:53, kur pas një mosmarrëveshjeje mes të dyshuarve, situata ka eskaluar në një përleshje të dhunshme.

Njësitet policore kanë intervenuar menjëherë dhe më pas kanë kryer bastisje në dy lokacione – në shtëpitë e të dyshuarve.

Gjatë kontrollit janë konfiskuar një pistoletë me 50 fishekë, dy karikatorë të armës automatike AK-47 me 45 fishekë dhe dhjetë fishekë të armës së shkurtë, të gjetur në lokacionin e dytë.

“Podujevë 21.10.2025 – 14:53. Janë arrestuar katër të dyshuar meshkuj kosovar, nën dyshimin se të njëjtit pas një mosmarrëveshje janë përfshirë në rastet e lartcekura. Njësitet policore në vendin e ngjarjes dhe gjatë bastisjes në dy lokacione- në shtëpitë e të dyshuarave kanë gjetur dhe konfiskuar: 1-pistoletë me 50-fishekë, 2-karikatorë të AK-47 me 45-fishekë, ndërsa në lokacionin e dytë 10-fishekë të armës së shkurtë. Me vendim të prokurorit, të dyshuarit pas intervistimit janë dërguar në mbajtje”, thuhet në raport./Arbresh.info