Ministri në detyrë i Punëve të Brendshme, Xhelal Sveçla, ka deklaruar se përmirësimi i kushteve të punës për zyrtarët policorë do të jetë një nga prioritetet kryesore në mandatin e ri qeverisës, duke paralajmëruar investime në infrastrukturën policore në mbarë vendin.

Përmes një postimi në Facebook, Sveçla thekson se qeveria synon transformimin e plotë të stacioneve policore, me qëllim krijimin e hapësirave moderne dhe funksionale për punën e efektivëve, shkruan Arbresh.info

“Në mandatin e ri qeverisës, përmirësimi i kushteve të punës për zyrtarët policorë do të jetë një nga prioritetet tona kryesore. Do të investojmë në transformimin e plotë të çdo stacioni policor në të gjithë vendin, duke krijuar hapësira moderne, funksionale dhe të sigurta, që u mundësojnë zyrtarëve tanë të kryejnë detyrën me dinjitet dhe efikasitet maksimal.”

Ai theksoi se investimet do të synojnë rritjen e standardeve të punës dhe forcimin e kapaciteteve operacionale të Policisë, në funksion të garantimit të sigurisë për qytetarët./Arbresh.info