Nënshkruhet marrëveshja për rregullimin e shtratit të lumit Llap, investimi kap vlerën e 4 milionë eurove

14:23 | 20 Shtator 2025
E.K

Kryetari i Podujevës, Shpejtim Bulliqi, ka njoftuar se është nënshkruar një memorandum bashkëpunimi për ndërtimin e shtratit të lumit Llap dhe lumenjve.

Marrëveshja është arritur me Ministrinë e Mjedisit, Planifikimit Hapësinor dhe Infrastrukturës, teksa në një video me ushtrues të detyrës së drejtorit të kësaj ministrie, Hysen Durmishi, është bërë i ditur se investimi përfshin shifrën e 4 milionë eurove.

“Ky investim i madh nënkupton siguri shtesë për jetën e qytetarëve tanë, të shtëpive dhe të pronave, si një hap i fuqishëm për mbrojtje nga vërshimet dhe fatkeqësitë e tjera”, ka shkruar Bulliqi në Facebook.

“Ky projekt përveçse do ta rregullojë komplet shtratin e lumit Llap, do të ndikojë edhe në aspektin e ambientit që të jetë sa më pak i ndotur, i rregulluar që ta shfrytëzojnë qytetarët”, ka thënë në anën tjetër Durmishi.