Kryeministri i Kosovës, Albin Kurti bashkë me zëvëndëskryeministrin, Besnik Bislimi dhe ministrat e udhëheqësit e institucioneve dhe dikastereve relevante po marrin pjesë në mbledhjen e VI’të të Këshillit Ministror për Integrim Evropian.

Kurti tha se masat që janë në fuqi ndaj Kosovës, bien ndesh me përpjekjet e rajonit për integrim të përshpejtuar ne Bashkimin Evropian sidomos me Planin e Rritjes dhe qëllimet e tij, shkruan Arbresh.info.

Ai vlerësoi se kanë përmbushur të gjitha kërkesat e Bashkimit Evropian për heqjen e masave kufizuese teksa shtoi se këto masa duhet të largohen.

Po ashtu, ai tha se agresioni i Rusisë ndaj Ukrainës ka rikthyer rëndësinë e zgjerimit të Bashkimit Evropian.

“Pas një dekade stagnimi, zgjerimi i Bashkimit Evropian është kthyer në agjendë. Agresioni i Rusisë ndaj Ukrainës ka rikthyer rëndësinë e zgjerimit të Bashkimit Evropian jo vetëm si zonë e prosperitetit socio-ekomonik por edhe e paqes dhe sigurisë.”, tha Kurti.

Ndër të tjera ai tha se në Samiti i Bashkimit Evropian në Ballkanin Perëndimor rikonfirmoi të ardhmen e rajonit në Bashkimin Evropian.

Ai po ashtu përmendi edhe dorëzimin e aplikacionit e Kosovës për anëtarësimin në BE.

“Besojmë që anëtarësimi në Bashkimin Evropian duhet të jetë i bazuar në meritokraci. Si demokracia më e avancuar në rajon, ne jemi të gatshëm t’i përgjigjemi mijëra pyetjeve teknike që vijnë nga Komisioni Evropian”, u shpreh ai.

Shefi i ekzekutivit tha se krahasuar me rajonin, Kosova është jo vetëm e gatshme për statusin e vendit kandidat  por edhe për negociatat dhe kapitujt e shumtë drejt anëtarësimit.

Sipas tij, anëtarësimi në Bashkimin Evropian është zgjedhje strategjike.

Ndër të tjera, kryeministri Kurti theksoi se kanë zbatuar mbi 70% të reformave të planifikuara bashkë me Komisionin Evropian.

“245 nga 341 reforma të planifikuara”, tha ai.

Ndërkaq si element të tretë të rëndësishëm, Kurti përmendi edhe aprovimin e Bashkimit Evropian të Planit të Rritjes për Ballkanin  Perëndimor.

Sipas tij, qëllimi i këtij plani është të përshpejtojë zhvillimin socioekonomik të rajonit me Bashkimin Evropian dhe në këtë mënyrë të përshpejtojë procesin e anëtarësimit.

“Planin e Rritjes e shohim si hap të duhur në drejtimin e duhur. Ne besojmë që Bashkimi Evropian mund të reformohet dhe të zgjerohet dhe se përfitimet e përbashkëta të tregut Evropian duhet të lidhen me reformat ekonomike dhe demokratike, prandaj ne ju qëndrojmë me vendosshmëri parimeve në të cilat ky plan është i rrënjosur. Nuk duhet të ketë përfitime nga Bashkimi Evropian, pra as fonde pa i përqafuar vlerat e Bashkimit Evropian.”, u shpreh ai./Arbresh.info/