Kryeministri i Kosovës, Albin Kurti ka kujtuar të rënët në grup dëshmorësh të Ushtrisë Çlirimtare të Kosovës nga fshatrat e zonës së Drenicës.

Me anë të një postimi në Facebook, ai tha se liria e Kosovës sot, është vet trofeu i luftës së tyre dhe i luftës së bashkëluftëtarëve të tyre të Ushtrisë Çlirimtare të Kosovës, shkruan Arbresh.info.

“Teksa numërojmë ditët që kalojnë të të dy muajve të mbetur deri te ditët e 25-vjetorit të çlirimit të Kosovës në mes të qershorit, çdo ditë kujtojmë dëshmorët e rënë për arritjen e çlirimit para 25 vitesh dhe për lirinë e jetuar që nga atëherë.”, ka shkruar ai.

“Sot, më 14 prill, e kujtojmë një grup dëshmorësh të Ushtrisë Çlirimtare të Kosovës nga fshatrat e zonës së Drenicës, të rënë 25 vite më parë, më 14 prill 1999: Bejtë Rexhepi, Fazli Qerkini, Hajzer Rexhepi, Agron Berisha, Fehmi Rama, Mehdi Hoxha dhe Naim Tiku. Ata ishin vullnetarë në luftën e drejtë të Ushtrisë Çlirimtare të Kosovës, tek e cila ishte përbashkuar gjithë përpjekja e popullit shqiptar vendas të Kosovës për tu çliruar nga Serbia pushtuese. Jetëshkrimet e Bejtës, Fazliut, Hajzerit, Agronit, Fehmiut, Mehdiut dhe Naimit, janë profile biografike tashmë historike, e të cilat mbajnë vulën e dosjeve të luftëtarëve të lirisë. Aktivitetet e tyre politike dhe kombëtare, janë shembujt më të kulluar të angazhimit më total patriotik deri në flijim për lirinë e atdheut të tyre.”, shtoi Kurti.

“Lavdi dëshmorëve të lirisë, luftëtarë të UÇK-së, Bejtë Rexhepi, Fazli Qerkini, Hajzer Rexhepi, Agron Berisha, Fehmi Rama, Mehdi Hoxha dhe Naim Tiku, ndër lavde për dëshmorët e rënë për lirinë e Kosovës!”, përfundoi kryeministri Kurti./Arbresh.info/