Konjufca në Shqipëri: Të përkushtuar që kufirin ta bëjmë inekzistent

13:03 | 7 Qershor 2021

Kreu i Kuvendit, Glauk Konjufca, në vizitën e tij të parë zyrtare si Kryetar i Kuvendit të Republikës së Kosovës zgjodhi ta realizoj pikërisht në Shqipëri.

Dhe, në kuadër të kësaj vizite, takoi fillimisht Kryetarin e Kuvendit të Republikës së Shqipërisë, Gramoz Ruçi.

“Takimi me z.Ruçi shënon edhe një shtytje të rëndësishme në avancimin e bashkëpunimit ndërparlamentar dhe ndërshtetëror. Prandaj, në një atmosferë të përzemërt dhe tejet vëllazërore, me z.Ruçi diskutuam për shkëmbimin e përvojave dhe intensifikimin e bashkëpunimit ndërmjet Kuvendit të Shqipërisë dhe Kuvendit të Kosovës”, shkruan Konjufca në Facebook.

Sipas Konjufcës në takim dominoi pajtueshmëria e plotë dhe vullneti i dyanshëm për dinamizimin dhe fuqizimin e mëtutjeshëm të bashkëpunimit, harmonizimin e agjendave me interes mbarëkombëtar, bashkërendimin dhe unifikimin e hapave gjatë proceseve integruese rajonale dhe euro-atlantike të dy shteteve tona.

“Mbetemi të përkushtuar që kufirin e padrejtë mes nesh ta bëjmë jo vetëm sa më të padukshëm, por edhe inekzistent në një të ardhme.”/arbresh.info/

Shpërndaje në rrjete sociale

Lajmet më të lexuara