Kryeministri i Kosovës, Ramush Haradinaj, gjatë ditës së sotme ka pritur në takim përfaqësuesit e Bordit Menaxhues dhe Ekzekutiv të AKP’së. Hradinaj i ka kërkuar drejtuesve të AKP’së që çështja e Pallatit të Rinisë në Prishtinë të zgjidhet brenda një periudhe të shkurtë kohore.

Kreu i Qeverisë ka kërkuar nga AKP që Pallatin e Rinisë t’ua kthejë prishtinaseve.

Gjatë takimit Haradinaj ka kërkuar nga udhëheqja e AKP-së që të nisin procedurat adekuate konform ligjeve në fuqi, që fati i Pallatit të Rinisë në Prishtinë të marrë epilog, përkatësisht që t’u kthehet qytetarëve të Prishtinës, të cilët gjatë viteve ‘70 të shekullit të kaluar kanë paguar vetkontribut për ndërtimin e tij. Ai kërkoi nga Bordi i AKP-së që të fillojë procedurat ligjore të cilat mundësojnë që për një kohë optimale me Pallatin e Rinisë të menaxhojë Komuna e Prishtinës.
Në takim, në takim janë shtjelluar dhe janë diskutuar edhe tema shumë të rëndësishme, siç është çështja e Fabrikës së Gypave në Ferizaj, ku palët u dakorduan që gjetja e zgjidhjeve të kënaqshme për të gjithë është jetike për Kosovën.

Përfaqësuesit e AKP-së kanë bërë të ditur se sot ia kanë dorëzuar kryeministrit Studimin e Fizibilitetit (versionin në gjuhën shqipe) për konsolidimin e Trepçës, si kompani ligjore afariste e mëvetësishme.