Autoriteti Rregullativ i Komunikimeve Elektronike dhe Postare (ARKEP), javën tjetër do të merr vendim për ndarjen e frekuencave të brezit 1800 Mhz, dy operatorëve mobil Vala dhe Ipko. Dhënia e këtyre frekuencave i mundëson dy operatorëve mobil Vala dhe Ipko ofrimin e shërbimeve të internetit të shpejtë 3 dhe 4 G.

Kështu kanë bërë të ditur burime të afërta me këtë proces. I njëjti tha se shumë shpejtë ARKEP do të dalë me një vendim përfundimtarë për procedurat e mëtutjeshme.

Ndërsa, sipas njoftimit të ARKEP-it, i cili i ka njoftuar dy operatorët e lartë përmendur se ka miratuar vendimet finale lidhur me metodologjinë e vlerësimit të brezave frekuencore 800 dhe 1800 MHz dhe përcaktimin e koeficientit sipas formulës €/MHz/ që për kokë banori për brezin 1800 MHz është caktuar të jetë në vlerë prej 0.37 euro.

Brezi frekuencor sipas njoftimit të ARKEP u jepet në shfrytëzim operatorëve për 15 vitet e ardhshme.

“Përcaktimin e dy opsioneve për sasinë minimale prej 2×5 MHz për operator dhe atë maksimale prej 2×15 MHz për operator, që do t’i ndahen sipas vendimeve finale pas pranimit të konfirmimeve nga operatorët për shfrytëzim efektiv me fillim nga data; 6 dhjetor, 2015 duke përfshirë edhe informacionin e plotë mbi strukturën e pagesave të detyrimeve ndaj Autoritetit respektivisht Buxhetit të Republikës së Kosovës”, thuhet në vendimin e ARKEP.

Po ashtu, sipas autoriteti përmes vendimmarrjes për ndarjen e resurseve shtesë në brezin 1710 – 1785 & 1805 – 1880 MHz, dy operatorëve të kualifikuar u mundëson që t’i rrisin kapacitetet e rrjetave ekzistuese, duke përmirësuar dhe avancuar edhe më tutje kualitetin e shërbimeve të ofruara dhe që të gjenden më afër kërkesave të tregut, respektivisht konsumatorëve si shfrytëzues fundor të shërbimeve të komunikimeve elektronike.

“Vendimet dhe Autorizimet Individuale për dhënien/caktimin në shfrytëzim të resurseve shtesë të frekuencave do të zyrtarizohen gjatë javëve në vijim dhe data e lejimit të shfrytëzimit komercial nga ana e operatorëve sipas vendimeve do të jetë data; 6 dhjetor, 2015”, thuhet në vendimin e ARKEP.

Ndryshe, sipas njoftimit të ARKEP më 10 shtator, 2015 ka pranuar zyrtarisht aplikacionin e parë të parashtruar nga operatori, Telekomi i Kosovës Sh.A me kërkesën për marrjen e resurseve të reja frekuencoreprej 2 x 10 MHz në brezin frekuencore 2100 MHz.

Ndërsa, më 14 tetor të këtij viti operatori Telekomi i Kosovës Sh.A ka dërguar të dhënat shtesë si të kërkuara nga ana e Autoritetit për shqyrtimin meritor të kërkesës dhe aplikacionit për shfrytëzimin e resurseve frekuencore në brezin 2100 MHz.