Ambasadori i Bashkimit Evropian në Kosovë, Aivo Orav, ka theksuar angazhimin e tij për të ndihmuar Kosovën që të afrohet sa më shumë me BE-në.

Në një opinion të botuar në ueb-faqen zyrtare të Zyrës së BE-së në Kosovë, Orav ka theksuar se vullneti i popullit të Kosovës për të iu bashkuar BE-së është i qartë, dhe kjo ndan një vizion të përbashkët me Bashkimin Evropian për Ballkanin Perëndimor.

“E ardhmja e rajonit është në BE. Së bashku, duam të ecim përpara drejt këtij synimi të përbashkët, ka thënë Orav.

Orav ka porositur Kosovën që të shfrytëzojë plotësisht Planin e Rritjes duke implementuar Reformën e Agjendave dhe të lëviz më afër BE-së.

“Me këtë në mendje, mesazhi im për Kosovën është që të shfrytëzojë plotësisht Planin e Rritjes, të zbatojë Agjendën e saj të Reformave dhe të afrohet më shumë me BE-në. Zgjerimi është një proces i bazuar në merita, dhe ritmi i integrimit është gjithashtu në duart e Kosovës. Kjo do të varet nga gatishmëria dhe historia e saj në zbatimin e reformave të nevojshme”, ka shkruar Orav./Arbresh.info