Komisioni Parlamentar për Legjislacion ka miratuar Projektligjin për buxhetin e Republikës së Kosovës për vitin 2019.

Kryetarja e komisionit Albulenë Haxhiu ka thënë se nuk e voton projekt buxhetin pasi që sipas saj është buxhet i asfalltit.

“Arsyeja pse unë nuk mund të votoj për këtë draftbuxhet është se konsiderojmë së nuk është buxhet i zhvillimit, i reduktimit të varfërisë, por i asfalltit. Nuk garanton që shëndetësia do të përparoj apo arsimi. Nuk është ndarë buxhet për avancimin e FSK-së. Nuk ka projekte zhvillimore, e tkurr ndihmën sociale. E mbështet luksin e Zyrës së Kryeministrit, Presidentit. Nuk e adreson Ligjin për lehonat, shtesat për  fëmijët nuk i adreson,  e as kërkesat e grevistëve nuk i përkrah”, ka thënë ajo.

Deputeti Frashër Krasniqi ka thënë se PSD e ka dhënë qëndrimin për buxhetin.

“Po keqkuptohemi qëllimisht apo pa qëllim mbi rolin e komisionit për çështje të caktuara apo për buxhetin. Vendi ku duhet të folet për aspektet përmbajtjesore për buxhetin është seanca apo Komisioni për Buxhet. Komisioni jonë e ka për qëllim që të shqyrtoj a është buxheti në përputhje me Kushtetutën”, ka thënë ai.

Edhe deputetja Xhevahire Izmaku ka thënë se pret deklarime tjera, e jo politike.

“Buxheti ka më shumë amandamente të opozitës se sa të pushtetit. Deputetët e subjekteve politike e kanë ndarë”, ka thënë ajo.

Deputeti Hajdar Beqa i propozoi deputetes Haxhiu që ta përcjellë në Kushtetuese nëse sheh hapësirë ligjore.

“Sa i përket raportit mbi ndarjet buxhetore, kemi pasur afatet kur kemi mundur të diskutojmë. Është mirë të votojmë dhe nuk pajtohem kur thotë se bjen ndesh me Kushtetutën. Nëse kryetarja e thotë këtë le ta dërgoj në Kushtetuese ndoshta ka sukses sikurse në lëndët tjera”, tha ai.

Deputeti Bilall Sherifi ka thënë se janë harxhuar ditët për diskutime.

“Kryetarja e paska pa që është një vend që është në shkelje me Kushtetutën atëherë le ta dërgoj. Nga i more vesh të gjitha këto defekte në ligj nëse qenka jo transparent”, ka thënë ai.

“Nuk je ti me m’bo pytje,” i është përgjigur Haxhiu, deputetit Sherifi./arbresh.info/