Fillimi i muajit gusht sjell në Prishtinë, miqësoren mes FC Prishtinës dhe Shkëndijës së Tetovës. Klubi kryeqytetas përmes njoftimit në faqen e tyre zyrtare, kanë konfirmuar zhvillimin e miqësores me tetovarët, takim ky që do të luhet me 2 gusht në Prishtinë.

“Me kërkesë të bashkatdhetarëve tanë nga diaspora dhe për të përmbushur interesimin e tyre me ekipet më në famë shqiptare nga Kosova dhe Maqedonia, dy klubet do të organizojnë ndeshje miqësore në stadiumin e qytetit në Prishtinë më 2 gusht 2015”, është thënë në faqen zyrtar të klubit prishtinas.

Skuadra e Shkëndijës së Tetovës, edicionin e fundit në kampionatin maqedonas, ka përfunduar në vendin e tretë duke u kualifikuar për Evropë. Edhe pse u eliminua në raundin e parë, Shkëndija dy ndeshjet ka luajtur baras me skuadrën skoceze, FC Aberdeen (1:1 dhe 0:0).

Tetovarët, që kanë skuadër më të shtrenjtë në rajon, u eliminuan nga ish-skuadra e prirë prej trajnerit të madh Alex Ferguson dhe e cila në raundin e dytë të Europa League ka eliminuar skuadrën shumë herë me buxhet më të madh Rjeka nga Kroacia.