Organizata Jo-Qeveritare INPO sot përmes një konference do të publikojë raportin e Indeksit të kënaqshmërisë së qytetarëve me shërbimet komunale në Prishtinë.

Panelistë në këtë konferencë do të jetë sekretarja e Ministrisë së Administrimit të Pushtetit Lokal, Rozafa Ukimeraj, kryetari i Komunës, Shpend Ahmeti dhe kryesuesi i Kuvendit Komunal, Halim Halimi.

Albulena Nrecaj- drejtoreshë  e INPO-s, e ftuar në emisionin e mëngjesit të RTK-së, tregoi se indeksi është dizajnuar të bëjë vlerësimin e kënaqshmërisë me shërbimet komunale të ofruara  nga komuna bazuar në kompetenca vetanake.

“ INPO monitoron shërbimet e nivelit komunal  ku pos UNDP-së që del me këtë raport çdo tre vite, INPO synon këtë ta bëjë çdo vit .Indeksi është dizajnuar të bëjë vlerësimin e kënaqshmërisë me shërbimet komunale të cilat ofrohen  nga komuna bazuar në kompetenca vetanake. Indeksi ka bërë matjen e 15 lloje të ndryshme të shërbimeve komunale, si dhe matjen e kënaqshmërsië së qytetarëve me pushtetin lokal duke i pyetur qytetarët për nivelin e kënaqshmërisë së tyre me punën e Kryetarit, Kuvendit Komunal dhe Drejtorive Komunale  ”, tha Nrecaj

Nrecaj tha se fillimisht INPO javën e kaluar ka publikuar raportin për komunën e Ferizajit, ku pas anketimit të qytetarëve, prej tyre 58% janë të pakënaqur me punën e Kryetarit aktual, ndërsa  si pike problematike e pakënaqshmërisë rezultoi të jenë parkingjet me përqindje të lartë prej 82%.

“Prishtina është ranguar mirë në këtë raport ku  janë përdorur 38 indikatorë për 15 fusha për të bërë këto matje dhe  prej 595 qytetarëve të anketuar më shumë se gjysma e tyre janë të kënaqur me punën e kryetarit të komunës ndërsa një numër më i madh janë të pakënaqur me kuvendin komunal”- theksoi Nrecaj.

Ajo gjithashtu tha se INPO ka për qëllim të zgjerojë punën e këtij projekti edhe në komuna tjera por kjo padyshim ka kosto të lartë.