Ekspertë të ekonomisë po kërkojnë nga Qeveria që të mos e nis funksionimin e Ligjit për Investimet Strategjike me Brezovicën.

Dështimi i mëhershëm i investimeve në këtë resort, sipas tyre, vazhdon të lërë hije të zezë, raporton KTV.

Andaj, propozojnë që procesi të shkojë në një mënyrë tjetër.

Nga ana tjetër, kryetari i Shoqatës së Turizmit Alternativ, Baki Hoti, vlerëson se dështimi i këtij projekti ka sjellë probleme të mëdha për turizmin.

Sipas tij, Qeveria duhet të ketë një strategji si t’i qaset nxitjes së investimeve në turizëm.

Në Ministrinë e Tregtisë dhe Industrisë nuk kanë pranuar të flasin para kamerës për këtë çështje.

Mirëpo, në një përgjigje elektronike, kjo ministri ka sqaruar se bashkë me USAID-in kanë identifikuar të metat e procesit të kaluar dhe i kanë identifikuar strategjitë adekuate, të cilat do të mundësojnë identifikimin dhe gjetjen e investitorëve.

Qeveria nuk kishte arritur të finalizonte kontratën me konsorciumin francez, “MDP Consulting”, pasi ky i fundit nuk arriti t’i gjente 160 milionë euro të fazës së parë të investimeve, duke bërë që i gjithë projekti të kthehet në pikën zero.

Pak ditë pas dështimit, përfaqësuesit e konsorciumit, kanë përmendur dy arsye kryesore që e çuan projektin drejt dështimit.

Ka qenë paqëndrueshmëria politike në Kosovë dhe kërcënimet nga Beogradi, të mbështetur dhe nga ministrat serbë në Qeverinë e Kosovës.