Vlora Dumoshi, ish-drejtoresha e Kulturës në Komunën e Prishtinës në kohën sa ka qenë kryetar, Isa Mustafa, tash shefe e stafit në kryeministrinë e udhëhequr po nga Mustafa ka shprehur bindjen se ai është zgjidhja e çështjeve vitale të qytetarëve.

Ka përmendur fabrikën e ujit, projektin për ngrohje përmes koogjenirimit dhe atë në ardhje, për energjinë elektrike.

“Pesë vjet më parë kryetari Mustafa e nënshkroi marrëveshjen për ndërtimin e Fabrikës së Ujit në Shkabaj. Sot, ky objekt u përurua nga njeriu që vuri themelet e jetësimit të tij. E jetësuam projektin për ngrohjen përmes koogjenerimit i cili do të ofrojë ngrohje për tërë banorët e kryeqytetit”, ka shkruar Dumoshi.

“Gjatë Qeverisjes Mustafa u kryen të gjitha punët dhe pritet të fillojë ndërtimi i Termocentralit ‘Kosova e Re’, e cila do të krijojë stabilitet të plotë të furnizimit me energji elektrike në tërë vendin. Zgjidhja e çështjeve vitale të qytetarëve lidhet me qeverisjen e Isa Mustafës”, ka shtuar më tej ajo.

Dumoshi është përmendur si një prej kandidatëve të mundshëm të LDK-së në garën për kryetar të Komunës së Prishtinës.