Ministrja në detyrë e Industrisë, Ndërmarrësisë dhe Tregtisë, Mimoza Kusari-Lila, ka vlerësuar punën dhe përkushtimin e ndërmarrëses kosovare Mevlide Vrajolli, duke e cilësuar si shembull frymëzues të suksesit në bujqësi dhe përpunim.

Sipas Kusari-Lilës, Mevlide Vrajolli prej më shumë se një dekade merret me kultivimin dhe përpunimin e bimëve mjekësore dhe aromatike, duke ndërtuar një biznes familjar që siguron të ardhura për familjen e saj dhe punësim për dy gra të tjera.

Postimi i plotë:

Duart e arta të Mevlide Vrajollit dinë të bëjnë mrekulli.

Nga dheu i tokës pjellore të Kosovës, ku me shumë dashuri dhe përkushtim kultivon bimë të ndryshme mjekësore dhe aromatike, ajo ka ndërtuar një biznes familjar që sot siguron të ardhura për familjen e saj dhe punësim për dy gra të tjera.

Për më shumë se 10 vjet, Mevlidja merret me prodhimin e vajrave esencialë nga livanda, rozmarina, kokosi dhe aroma të tjera natyrale, çajra, sapunë e fruta të thata.

Në një sipërfaqe prej një hektari, ajo kultivon rozmarinë dhe bimë të tjera, të cilat i përpunon vetë në shtëpinë e saj, duke i shndërruar në produkte të shëndetshme dhe cilësore.

Nga kultivimi, përpunimi e deri te paketimi organik, çdo produkt mban vulën e punës së ndershme, përkushtimit dhe dashurisë për natyrën.

Mbështetja e prodhuesve vendorë, veçanërisht e grave ndërmarrëse, mbetet një nga prioritetet tona për të fuqizuar ekonominë, për të krijuar vende të reja pune dhe për të promovuar produktet autentike të Kosovës./Arbresh.info