Projekti i ri i Real Madrid nën drejtimin e José Mourinho po vazhdon me ritëm të lartë, ndërsa klubi ka vendosur të përforcojë edhe krahun e majtë të mbrojtjes pas afrimeve të Ibrahima Konaté dhe Denzel Dumfries.

Sipas planeve të stafit teknik, dy emrat kryesorë në listë janë Josko Gvardiol i Manchester City dhe Riccardo Calafiori i Arsenal, raporton Diario AS.

Mourinho kërkon një mbrojtje fleksibile, e aftë të kalojë gjatë ndeshjes nga formacioni me katër në atë me tre mbrojtës, prandaj të dy lojtarët vlerësohen për aftësinë e tyre për të luajtur si qendërmbrojtës dhe si mbrojtës i krahut.

Trajneri portugez synon gjithashtu balancë në skuadër, duke qenë se krahët e djathtë të mbrojtjes, me lojtarë si Trent Alexander-Arnold dhe Dumfries, kanë profil më ofensiv. Për këtë arsye, kërkohet një profil më defensiv në të majtë për të ruajtur ekuilibrin taktik.

Në rastin e Gvardiol, situata në Manchester City nuk është krejtësisht stabile, pasi dëmtimet e fundit kanë ndikuar në minutazhin e tij.

Klubi anglez kishte paguar rreth 90 milionë euro për kroatin në vitin 2023, ndërsa aktualisht vlera e tij në treg vlerësohet rreth 70 milionë euro. Pavarësisht kontratës deri në vitin 2028, City raportohet se ka nisur lëvizjet për rinovim, ndërsa Real Madridi mbetet i interesuar.

Nga ana tjetër, Calafiori shihet si opsion më i realizueshëm. Italiani ka kontratë me Arsenalin deri në vitin 2029 dhe vlerësohet rreth 55 milionë euro. Ai ka humbur pjesërisht vendin e titullarit, por vazhdon të ketë minuta të rregullta në Premier League dhe në kompeticionet evropiane.

Calafiori është një lojtar i njohur për Mourinho-n që nga periudha e tij te Roma, ku tekniku portugez i kishte dhënë mundësi në ekipin e parë.

Në këtë moment, Real Madridi pritet të marrë vendim mes një operacioni të madh financiar për Gvardiol ose një transferimi më të realizueshëm si Calafiori, ndërsa largimet në repartin defensiv gjithashtu do të jenë pjesë e planit të verës./Arbresh.info