Sa e rëndë për shëndetin e pacientëve mund të jetë lodhja e infermierëve dhe çfarë ndodh kur kjo lodhje kthehet në rraskapitje profesionale?

Rezultatet në kujdesin shëndetësor ndikohen ndjeshëm nga ana e cilësisë, por fatmirësisht nuk lidhen domosdoshmërisht me rritje të nivelit të vdekshmërisë, pavarësisht faktit se disa pjesë të kujdesit shpesh nuk realizohen…

Sindroma e rraskapitjes profesionale (burnout) karakterizohet nga lodhje emocionale, depersonalizim dhe ndjesi e ulët e përmbushjes personale dhe është e zakonshme tek infermierët.

Studiues nga universitetet e Stanfordit, Harvardit dhe Universiteti Ekonomik i Barcelonës kanë analizuar disa studime të lidhura për të hetuar marrëdhënien mes burnout-it të infermierëve dhe cilësisë dhe sigurisë së kujdesit shëndetësor, si dhe sëmundshmërisë dhe vdekshmërisë së pacientëve.

Dy vlerësues të pavarur identifikuan studime që raportonin lidhje sasiore midis burnout-it të infermierëve dhe të dhënave për sigurinë, kënaqësinë e pacientëve ose cilësinë e kujdesit.

Në një studim të publikuar në JAMA, u analizuan gjithsej 85 studime që përfshinin 288 mijë e 581 infermierë me moshë mesatare 33.9 vjeç, kryesisht gra (87.2%) nga 32 vende. Burnout-i profesional arrinte në 30.7%.

Burnout-i i infermierëve u lidh me:

-klimë më të dobët sigurie me 32%,

-nivel më të ulët sigurie me 47% dhe

-infeksione spitalore më të shpeshta me 80%,

-rrëzime të pacientëve me 88%,

-gabime në mjekim me 70%,

-ngjarje të padëshiruara ose incidente të sigurisë së pacientit me 58%

-kujdes të munguar që nuk u ofrua me 42%.

Burnout-i i infermierëve u shoqërua gjithashtu me rezultate më të ulëta në kënaqësinë e pacientëve me 49%, por jo me shpeshtësinë e ankesave apo abuzimit të pacientëve.

Së fundi, u lidh me cilësi më të ulët të kujdesit të vlerësuar nga infermierët me 56%, por jo me nivelin e vdekshmërisë.

Siguria dhe cilësia

Sa i përket sigurisë së pacientëve, efektet ishin më të ulëta kur burnout-i lidhej me ndjesinë e ulët të arritjeve personale, sesa me lodhjen emocionale.

Sa i përket cilësisë së kujdesit, përkeqësimi u vërejt përmes vlerësimit të vetë infermierëve, ku profesionistët raportuan:

-ulje të cilësisë së kujdesit me 56%,

-rritje të ushqyerjes me kateter në shtëpitë e të moshuarve me 80%

-rritje të përdorimit të kateterit urinar në shtëpitë e të moshuarve me 78%.

Cilat specialitete preken më shumë

Efekti negativ i burnout-it të infermierëve në sigurinë dhe cilësinë e kujdesit u vu re në shumicën e specialiteteve infermierore.

Në veçanti, tek infermierët:

-pa specialitet, ulja e sigurisë arriti 50% dhe e cilësisë 66%

-në kujdesin parësor, ulja e cilësisë arriti 5%

-në raste akute, siguria u ul me 45% dhe cilësia me 66%

-në urgjenca, siguria u ul me 84%

-në kujdes intensiv, siguria u ul me 38% dhe cilësia me 34%

-në pediatri, siguria u ul me 71%

-në geriatri, siguria u ul me 57%

-në psikiatri, siguria u ul me 95%

-në obstetrikë me 24%

-në onkologji, siguria u ul me 7% dhe cilësia me 45%

Siguria dhe cilësia sipas vendeve

Analiza tregoi lidhje mes burnout-it të infermierëve dhe sigurisë së kujdesit në shumicën e vendeve, konkretisht në: Australi, Belgjikë, Brazil, Kanada, Kinë, Ekuador, Gjermani, Iran, Irlandë, Japoni, Kore, Norvegji, Oman, Republikën Sllovake, Afrikën e Jugut, Spanjë, Tajlandë, Turqi, Mbretërinë e Bashkuar dhe SHBA, por jo në Greqi, Itali, Jordani dhe Arabinë Saudite.

Ndërsa për cilësinë e kujdesit, lidhja me burnout-in u vu re në Belgjikë, Brazil, Kanada, Kinë, Egjipt, Islandë, Iran, Itali, Afrikën e Jugut, Tajlandë dhe SHBA, por jo në Gjermani, Japoni, Zelandën e Re dhe Mbretërinë e Bashkuar./tvklan.al