Pas eliminimit nga Bayern Munich në çerekfinale të Ligës së Kampionëve, te Real Madrid tashmë ka nisur të mendohet për sezonin 2026/27. Edhe pse gara në La Liga mbetet e hapur, me Barcelona që ka gjashtë pikë avantazh para ndeshjes së sotme ndaj Celta-s, brenda klubit madrilen nuk ka shumë besim për përmbysje, përveç në rast të një rënieje të madhe të rivalit.

Në qendër të të gjitha analizave që po bëhen është presidenti Florentino Pérez. Ditët e fundit, ai ka zhvilluar biseda të shumta brenda dhe jashtë klubit, duke pranuar dy gabime kryesore për këtë sezon: emërimin e Xabi Alonso si trajner dhe vendimin për të përshpejtuar kalimin e Álvaro Arbeloa në ekipin e parë.

Zhgënjimi me trajnerin bask erdhi relativisht shpejt, ndërsa dyshimet për stafin aktual u kristalizuan pas humbjes në Mynih, duke shtyrë drejt një ndryshimi kursi për sezonin e ardhshëm.

Gjatë këtyre diskutimeve, emri i Vinícius Júnior është përmendur shpesh. Përballë kritikave dhe kërkesave ndaj brazilianit, përgjigjja e presidentit ka qenë e prerë: “Kjo është çështje e imja, ma lini mua”. Pérez e konsideron Vinícius si një aset kyç të klubit, si për të tashmen ashtu edhe për të ardhmen, dhe është i bindur se rinovimi i kontratës së tij do të realizohet. Çdo ndryshim i mundshëm në skuadër, sipas tij, kalon përmes një Viníciusi të lumtur në Madrid.

Marrëdhënia mes tyre ka qenë e afërt që nga ardhja e lojtarit në klub, ndërsa braziliani i është mirënjohës presidentit për mbështetjen në rastet e racizmit që ka përjetuar.

Pavarësisht formës së këtij sezoni, Pérez vazhdon të ketë besim të plotë te Vinícius, duke kujtuar se ai ka qenë vendimtar në fitimin e dy Ligave të Kampionëve, duke shënuar në finalet e Parisit dhe Londrës. Ai beson se braziliani do të vazhdojë të jetë figurë kyçe në vitet në vijim, sidomos përkrah Kylian Mbappé, për të cilin gjithashtu nuk mungon mbështetja, pavarësisht kritikave.

Një tjetër çështje që nuk e bind presidentin është hapja e madhe ndaj lojtarëve të akademisë nga ana e Arbeloas. Ai nuk e sheh të arsyeshme që në momente delikate të aktivizohen lojtarë në zhvillim, ndërkohë që në bankinë mbeten futbollistë për të cilët klubi ka investuar shuma të mëdha.

Mungesat e vazhdueshme në formacion të lojtarëve si Álvaro Carreras, Dean Huijsen dhe veçanërisht Franco Mastantuono kanë ngritur pikëpyetje, duke qenë se bëhet fjalë për investime të konsiderueshme që nuk po reflektohen në fushë.

Në këtë situatë, Florentino Pérez synon të ringjallë projektin e klubit, të cilin e konsideron ende shumë të fortë. Ai beson se cilësia e skuadrës nuk është reflektuar në paraqitjet e këtij sezoni dhe kërkon një trajner që di ta menaxhojë dhe ta shfrytëzojë maksimalisht potencialin e saj. Ndërkohë, lojtarët tashmë janë të vetëdijshëm se përgjegjësia për një sezon pa trofe nuk do të kalojë pa u vënë re./Arbresh.info