Kandidati për kryetar të Prishtinës nga LVV, Hajrulla Çeku ka vizituar sot disa lagje në pjesën veriore të Kodrës së Trimave, ku ka dëgjuar hallet dhe ankesat e banorëve.

Përmes një video të publikuar në facebook, qytetarët ankohen për mungesë të ujit, infrastrukturë, ndriçimi e qentë endacak, transmeton Arbresh.info.

Çeku u ka premtuar banorëve zgjedhjen e problemeve bazike si dhe ndërtimin e çerdheve të reja, parqeve, hapësirave gjelbëruese e kënde lojërash.

Postimi i plotë:

Çdo ditë afër qytetarëve, tani dhe pas fitores tonë. Bashkë do ta bëjmë Prishtinën qytet të jetueshëm e funksional.

Në lagjet që ndodhen në pjesën veriore të Kodrës së Trimave, dje takuam banorët e diskutuam për problemet që kanë e zgjidhjet tona që ofrojmë.

Mungesa e ujit, rregullimi i infrastrukturës, ndriçimi, qent e pa strehë janë vetëm disa prej tyre.

Problemet e Kodrës së Trimave do ti zgjedhim me themel. Ky është plani ynë për këtë lagje:

– Zgjidhje për pronat, adresim i drejtë e transparent i problemeve shumëvjeçare me pronësinë.
– Zgjidhje përfundimtare për furnizim të pandërprerë me ujë të pijes
– Nisje e transformimit të tërësishëm të lagjes përmes ndërtimit të lartë
– Dy çerdhe të reja publike ose me bazë në komunitet
– Rrugë të sigurta me ndriçim publik, trotuare të reja, kufizime shpejtësie dhe kalime për këmbësorë
– Menaxhimi efikas i mbeturinave dhe mirëmbajtje e pastërtisë
– Parqe, kënde lojërash dhe hapësira gjelbëruese
– Rehabilitimi i sistemit të kanalizimit fekal dhe atmosferik

Bashkë, për Prishtinën tonë!/Arbresh.info