Sot shënohet 35 vjetori i miratimit të Deklaratës Kushtetuese të 2 korrikut të vitit 1990, e shpallur nga delegatët e Kuvendit të Kosovës.

Në atë ditë historike, Kosova ishte shpallur njësi e veçantë, në kuadër të federatës së atëhershme.

Deklarata e 2 Korrikut 1990 ishte akti që do të shënoi hapin historik institucional të pavarësimit të Kosovës, i cili u zhvillua jashtë objektit të Parlamentit, në kushte të rrethimit nga forca të mëdha policore e ushtarake.

Deklaratën Kushtetuese mbi Kosovën si njësi të pavarur dhe të barabartë në kuadër të federatës apo konfederatës jugosllave, e shpallën në Prishtinë delegatët e Kuvendit të Kosovës.

Deklarata shënon edhe pikënisjen për pavarësimin e Kosovës nga Serbia, duke synuar që të trajtohet si e barabartë me republikat e atëhershme në federatën jugosllave. Kjo deklaratë i parapriu Kushtetutës së Kosovë e miratuar me 7 shtator 1990 në Kaçanik.

2 korriku 1990 dhe Kushtetuta e Kaçanikut, e miratuar më 7 shtator 1990, përfaqësojnë dy momente historike që shënuan vulosjen e pavarësisë së Kosovës, e cila u shpall më 2008, dhe që përmenden edhe në vendimin e Gjykatës Ndërkombëtare të Drejtësisë për legalitetin e saj.

Në përvjetorin e kësaj date të rëndësishme, në kuadër të ciklit të dokumentarëve, RTK ka përgatitur një dokumentar që trajton këtë ngjarje, e cila u bë një nga shtyllat kryesore të shtetësisë së Kosovës./rtk