Teksa afron data kur trupi gjykues në Dhomat e Specializuara pritet të vendosë për mocionin e mbrojtjes për rrëzimin e disa pikave të aktakuzës ndaj ish-krerëve të UÇK-së, tensionet mes mbrojtjes dhe Prokurorisë janë rritur. Prokuroria i kërkon mbrojtjes listën e dëshmitarëve deri më 18 gusht, kërkesë që po kundërshtohet me arsyetimin për vonesa në qasje ndaj materialeve relevante. Sipas ekspertëve, ky ritëm e shtyn një vendim të mundshëm përtej vitit 2025.

Ka mbetur edhe një javë që Prokuroria të kthejë përgjigje për mocionin e mbrojtjes së Hashim Thaçit, Kadri Veselit, Jakup Krasniqit dhe Rexhep Selimit për rrëzimin e pikave të aktakuzës. Nga Gjykata Speciale kanë bërë të ditur për RTK-në afatet që kanë palët pas kësaj.

Trupi gjykues i dha afat mbrojtjes deri më 12 qershor për të paraqitur kërkesën e përbashkët për rrëzimin e akuzave dhe Prokurorisë deri më 7 korrik për t’iu përgjigjur kërkesës. Trupi gjykues ka thënë se do të vendosë për mocionin deri më 14 korrik. Ky proces do të bëhet me shkrim. Në lidhje me seancat e ardhshme, trupi gjykues kërkoi nga mbrojtësit e viktimave që të jenë të gatshëm të paraqesin rastin e tyre duke filluar nga 16 korriku, derisa jemi në pritje të vendimit për mocionin për hedhjen e pikave të aktakuzës.

E tani që po afrohet radha e mbrojtjes për punën e saj, avokatët kanë bërë një kërkesë për disa afate lidhur me dorëzimin e listave të dëshmitarëve. E këtë e ka kundërshtuar Prokuroria, e cila vet kishte dorëzuar prova edhe pas afatit të fundit.

Ajo ka kërkuar nga mbrojtja që deri më 18 gusht të dorëzohen listat e plota të dëshmitarëve, për çka i janë përgjigjur avokatët mbrojtës.

Disa ekipe të Mbrojtjes kanë pasur vështirësi në marrjen e bashkëpunimit nga ofruesit e Rregullës 107 dhe kanë përjetuar vonesa të konsiderueshme në marrjen e përgjigjeve ose materialeve të kërkuara, duke çuar në vonesa pasuese në përpunimin dhe përgatitjen e çështjes së Mbrojtjes. Për shembull, Mbrojtja e Thaçit kërkoi zbulimin e dokumenteve nga një ofrues në vitin 2022, por mbi 900 artikuj të kërkuar u zbuluan gjatë majit dhe qershorit 2025.

Sipas mbrojtjes, kritikat e prokurorisë janë të padobishme.

Përveç kësaj, parashtrimet e ZPS-së në lidhje me kohëgjatësinë e mbylljes së çështjeve të ZPS-së dhe Konferencave Përgatitore të Mbrojtjes janë të padobishme dhe hutuese.

Ehat Miftaraj, drejtor ekzekutiv në Institutin e Kosovës për Drejtësi, thotë se sipas këtyre zhvillimeve, nuk pritet që brenda këtij viti të ketë vendim të shkallës së parë.

“Është strategji e prokurorisë që në njëfarë mënyrë ti jap sa më pak kohë mbrojtjes për tu përgatitur për të kundërshtuar aktakuzën, për të përgatitur dëshmitarët të cilët në njëfarë mënyre e thonë të kundërtën e asaj që e ka thënë ose e ka dërguar dëshmi prokuroria, por çka është e rëndësishme është ajo çka vendos trupi gjykues, trupi gjykues ka qenë jashtëzakonisht dorëlirë me prokurorinë prej fillimit të procesit deri më tani”, tha Miftaraj.

Ndërkohë, mbrojtja e të akuzuarve deri më tani ka njoftuar se planifikojnë të thërrasin 20 deri në 25 dëshmitarë, ku 15 prej tyre do të dëshmojnë në sallën e gjyqit. Nga ta, 12 nga mbrojtja e Thaçit, numër që mund të reduktohet, 10 nga mbrojtja e Krasniqit, derisa ajo e Veselit dhe Selimit nuk kanë planifikuar të thërrasin dëshmitarë./rtk