Drejtori ekzekutiv i Institutit të Kosovës për Drejtësi (IKD), Ehat Miftaraj, ka kritikuar politikanët dhe sistemin prokurorial në vend, për mos dënim të asnjë personi përgjegjës për masakrën e Dubravës.

Në një postim në Facebook, Miftaraj ka shkruar se me mosveprimin e tyre, politika po i amniston kriminelët e luftës në Kosovë.

“Në përvjetorin e 24 të masakres së Dubravës, ende askush i akuzuar apo denuar.  Mjaftohemi me deklarata patetike politike për çdo përvjetor. Politika për 24 vite me mos veprim i amniston kriminelet e luftës”, ka shkruar Miftaraj.

Ai pati dy fjalë edhe për sistemin prokurorial në vend, për të cilin tha se më me rendesi e ka pasur rehabilitimin e prokurorëve “dështaka”.

“Shtet hajgare, sistem dështak, prokurorë të pasur, pa dinjitet dhe pa pikë ndërgjegje”, ka shkruar ai.

Sot janë bërë 24 vjet nga masakra e tmerrshme e burgut të Dubravës, ku u vranë rreth 160 të burgosur shqiptarë të pambrojtur dhe u plagosën mbi 200 të tillë.

Në lidhje me këtë krim makabër, ende nuk ka asnjë të akuzuar, e lëre më ndonjë të dënuar./Arbresh.info