Sekretari i Përgjithshëm i NATO-s, Jens Stoltenberg njoftoi se nesër do të vizitojë Türkiye-n, do të takohet me presidentin Recep Tayyip Erdoğan dhe do të përcjellë mesazhin e solidaritetit për shkak të tërmeteve, raporton Anadolu.

Në konferencën për media që mbajti në përfundim të Takimit të Ministrave të Mbrojtjes të NATO-s, Stoltenberg pas pyetjes së gazetarit të AA-së dha informacione lidhur me mbështetjen që NATO ka dhënë për Türkiye-n dhe lidhur me vizitën që do të zhvillojë në Türkiye.

“Aleatët e NATO-s, partnerët dhe NATO kanë rritur mbështetjet e tyre”, tha Stoltenberg duke vënë në dukje se të gjithë aleatët kanë shprehur mbështetjen dhe ngushëllimet e tyre më të thella për shkak të tërmeteve me qendër në Kahramanmaraş.

Krahas ndihmave të aleatëve, NATO do të dërgojë objekte të strehimit, tha Stoltenberg i cili shtoi se këto do të dërgohen në Türkiye brenda disa ditëve.

“Nesër do të qëndroj në Türkiye për t’u takuar me presidentin Erdoğan dhe ministrin e Jashtëm, Mevlüt Çavuşoğlu si dhe që të shpreh solidaritetin dhe ngushëllimet e mia”, theksoi Stoltenberg, i cili potencoi se gjatë bisedimeve do të vlerësohet edhe koordinimi i ndihmave të NATO-s dhe aleatëve.

Stoltenberg rikujtoi se Takimin e Ministrave të Mbrojtjes të NATO-s e hapën dje me një minutë heshtje. “Falënderoj aleatët tanë për mbështetjen e tyre ndaj Türkiye-s. Edhe sot Takimin e Ministrave të Mbrojtjes e përfundova duke u bërë thirrje të gjithë aleatëve për të rritur më shumë mbështetjen dhe ndihmat strategjike”, tha ai.