Rudari: Nuk i fajësoj qytetarët, fajin e ka Bulliqi dhe Kurti që nxitën dhunë dhe vëllavrasje

20:06 | 27 Nëntor 2020
A. B.

Kandidati i LDK-së për kryetar të Komunës së Podujevës, Nexhmi Rudari, ka reaguar pas përleshjes që simpatizantët e partisë së tij kishin sot gjatë ditës me ata të Vetëvendosjes.

Ai, përmes një postimi në Facebook, ka thënë se nuk i fajëson qytetarët, por kundërkandidatin e tij nga Vetëvendosja Shpejtim Bulliqi dhe kryetarin e partisë së tij Albin Kurti të cilët, sipas tij, kanë nxitur dhe promovuar dhunë dhe vëllavrasje.

“Nuk i fajësoj qytetarët, të cilët sot reaguan në atë mënyrë duke provokuar incident dhe duke penguar aktivitetin tonë. Fajin e ka kandidati dhe shefi i tij nga Prishtina, të cilët gjatë gjithë këtyre ditëve nxitën e promovuan dhunë, vëllavrasje dhe bishta të sakicës. Të tillët përherë dhunën e kishin mjetin e vetëm të veprimit politik, prandaj Llapi ndaj tyre është dhe do të mbetet refuzues”, ka shkruar ai.