Kryeministri në detyrë i Kosovës, Albin Kurti, bashkë me ministrin e Financave, Besnik Bislimi kanë pritur sot në takime të ndara ambasadorët e QUINT-it dhe vendeve tjera në Kosovë.

Kjo u bë e ditur me anë të një komunikate për media, teksa u tha se takimi u mbajt për shkak të situatës së krijuar me përhapjen e koronavirusit në Kosovë.

“Fillimisht ai u takua me ambasadorët e shteteve të QUINT-it dhe shefen e Zyrës së Bashkimit Evropian në Kosovë, përkatësisht me ambasadorin e Shteteve të Bashkuara të Amerikës, Philip Kosnett, ambasadorin e Gjermanisë, Christian Heldt, ambasadoren e Francës, Marie-Chrisitine Butel, ambasadorin e Britanisë së Madhe, Nicholas Abbott, ambasadorin e Italisë, Nicola Orlando, dhe Përfaqësuesen e Posaçme të Bashkimit Evropian në Kosovë, Nataliya Apostolova”, thuhet në komunikatë.

Më pas, në një takim të përbashkët pritën ambasadorin e Austrisë, Christoph Weidinger, shefin e zyrës diplomatike të Belgjikës, Jean-Louis Servais, ambasadoren e Finlandës, Pia Stjernvall, ambasadoren e Holandës, Garrie Willems, ambasadorin e Norvegjisë,  Jens Erik Grøndah dhe ambasadorin e Zvicrës,  Jean-Hubert Lebet.

Në fund, Kryeministri në detyrë, Kurti dhe ministri në detyrë i Ministrisë së Financave dhe Transfereve, Bislimi pritën edhe ambasadorin e Bullgarisë, Hristo Gudjev, ambasadoren e Kroacisë, Danijela Barišić, ambasadorin e Republikës Çeke, Pavel Bílek dhe ambasadorin e Turqisë, Çağrı Şakar.

Në këto tre takime, Kryeministri në detyrë i njoftoi ambasadorët mbi situatën në vend pas përhapjes së virusit COVID-19 dhe masat e ndërmarra deri më tani nga Qeveria. Theks i veçantë u vë mbi pakon fiskale emergjente të hartuar nga Qeveria në detyrë.

Ambasadorët dhanë vlerësimet e tyre pozitive për punën e Qeverisë dhe institucioneve të Republikës së Kosovës në ballafaqimin me pandeminë COVID 19, dhe në të njëjtën kohë shprehën gatishmërinë dhe vullnetin për ta ndihmuar Republikën e Kosovës në çfarëdo forme.

Kryeministri në detyrë, Kurti shprehu falënderimet dhe mirënjohjen për ndihmën e vazhdueshme që komuniteti ndërkombëtarë po i jep Kosovës për menaxhimin dhe tejkalimin e kësaj sfide të përbashkët.