Në Klinikën e Gjinekologjisë dhe Akusherisë gjatë natës së djeshme është pranuar një grua shtatzënë 37 vjeçe nga Ohri, e cila fatkeqësisht gjatë pranimit vetëm se kishte humbur foshnjën(fetusin).

Për shkak të gjendjes febrile mjekët fillimisht kanë marrë material për testim me Covid-19 ndërsa rezultatet pritet të dalin gjatë ditës së sotshme. Pas intervenimit të duhur të mjekësve pacientja ka pasur përkeqësim të gjendjes shëndetësore dhe rreth orës 22:00 ka ndërruar jetë. Dyshohet se shkak për vdekjen e 37-vjeçares është tromembolia masive.

Bëhet fjalë për paciente me obezitet të lartë e cila 5 muajt e fundit nuk ka lëvizur fare, kurse sipas mjekëve në Ohër pacientja nuk i ka kryer me rregull kontrollet gjinekologjike.

Burime nga Klinika Gjinekologjike informojnë se gjendja e lehonës nga Kumanova që gjatë natës së djeshme u diagnostifikua me virusin korona është stabile dhe e njëjta tashmë gjendet në Klinikën Infektive. Foshnja e saj po mbahet në Klinikën e Gjinekologjisë dhe është në gjendje stabile, derisa janë marrë materiale për testim të foshnjës për Covid-19 dhe të njëjtat do të publikohen gjatë ditës së sotshme./alsat