Autoritetet në Afrikën e Jugut kanë deklaruar se do të ndërtojnë një mur rrethues rreth 40 kilometra përgjatë kufirit me Zimbabve, për të parandaluar hyrjen e paligjshme të migrantëve, nga frika e përhapjes së coronavirusit.

Sipas mediave të huaja, përcjellë Telegrafi, muri do të ngrihet në secilën anë të Portit të Hyrjes në Tokën e Beitbridge, për t’u siguruar që asnjë person që nuk posedon dokumente ose i infektuar të mos hyj në vend.

Raportohet se që nga e premtja Afrika e Jugut ka konfirmuar 202 raste nga coronavirusi, ndërsa asnjë të vdekur.

Presidenti i Afrikës së Jugut, Cyril Ramaphosa, tashmë ka urdhëruar mbylljen e 35 pikave të hyrjes në tokë.

“Kjo masë nuk do të jetë e efektshme nëse ‘muret’ në kufi nuk janë të sigurta”, tha Ministrja e Infrastrukturës, Patricia de Lille.

Ajo më tutje ka shtuar se punimet pritet të përfundojnë brenda një muaji.