Drejtori i Institutit Demokratik të Kosovës (KDI), Ismet Kryeziu, ka komentuar zhvillimet e fundit politike sa i përket heqjes pjesërisht të taksës 100 për qind për mallrat që vijnë nga Serbia dhe Bosnja e Hercegovina.

Kryeziu ka pohuar se Lidhja Demokratike e Kosovës, si pjesë e koalicionit qeverisë nuk ka mundur të ndikojë në qëndrimin e Kurtit për heqjen e taksës, si ka propozuar kjo parti, prandaj do të duhet të pranojë propozimin e Kurtit.

“LDK do të duhej që të pranonte propozimin e kryeministrit Kurti, edhe të mundësojë që sot ose nesër, Qeveria të marrë vendimin e propozuar për 15 mars”, ka shkruar Kryeziu në Facebook.

Ai ka deklaruar se 15 marsi e 1 prilli, janë dy javë edhe as në kohë e as në përmbajtje nuk përbëjnë kurrfarë ndryshimi nga propozimet për heqje të tërësishme të taksës.

Ndryshe, Qeveria e Kosovës ende nuk ka marrë ndonjë vendim lidhur me heqjen e pjesshme të taksës. Ndërsa, kryeministri, Albin Kurti, ka deklaruar se taksa 100 për qind do të largohet pjesërisht vetëm për lëndën e parë që importohet nga Serbia dhe Bosnja e Hercegovina që nga 15 marsi.