AKR bashkohet në një linjë me partinë e Ramush Haradinaj kur është fjala për ndyshim të kufijve.

Selam Shkodra, funksionar i lartë i AKR dhe zëvendësministër i Brendshëm, i ftuar në RTV Ora tha se dialogu me Serbinë është i domosdoshëm, por mbi bazën e reciprocitetit dhe palëve të barabarta.

Selam Shkodra: Nuk ka ndryshim të kufijve, jemi pro dialogut me të gjitha vendet fqinje, përfshirë dhe Serbinë, një dialog mbi bazën e parimeve të reciprocitetit dhe palëve të barabartë. Serbia duhet ta ketë parasysh që Kosova tashmë është një fakt i kryer si shtet i pavarur dhe sovran. Mund të bisedojmë vetëm për gjëra që janë në interes të dy vendeve.

Sa i takon taksës 100% ndaj mallrave serbe dhe insistimit të SHBA-ve për një pezullim të saj, Shkodra thotë se taksa mund të hiqet për respekt ndaj miqve amerikanë, por kurrsesi për të kthyer Serbinë në dialog.

Selam Shkodra: Kemi deklarime të liderit të partisë që u jep prioritet këshillave të miqve siç janë SHBA-të. Por kjo nuk do të thotë që në këtë moment deklarohemi domosdoshmërisht se taksa duhet të hiqet që Serbia të kthehet në dialog. Ne e bëjmë për respekt të SHBA-së dhe aleatëve tonë, por jo për shkak të presionit të Vuçiç dhe Daçiç.