NASA është duke i hetuar pretendimet se një astronaute ka hyrë në llogarinë bankare të ish-partneres në kohën kur ishte duke banuar në Stacionin Ndërkombëtar të Hapësirës.

Ky rast po cilësohet si dyshimi i parë për krim të kryer në orbitën e Tokës. Lajmin e ka bërë të ditur gazeta “New York Times”.

Anne McClain pranoi se ka hyrë në llogarinë bankare të ish-partneres kur ishte në Stacionin Ndërkombëtar të Hapësirës, por mohoi se ka bërë ndonjë vepër të ndaluar. Përmes një avokati ajo tha se vetëm i ka përcjellur mjetet e përbashkëta të çiftit.

Besohet se ish-partnerja e astronautes, Summer Worden, e ka dorëzuar një ankesë në Komisionin Federal të Tregtisë. Sipas saj, në llogarinë bankare i ka hyrë dikush nga një rrjet kompjuterik i NASA-s pa lejen e saj.

Para ndarjes, McClain e ndihmonte partneren për ta rritur djalin që e kishte nga një marrëdhënie e mëhershme dhe i kishte ofruar asaj ndihmë financiare. Avokati i astronautes tha se ajo vetëm ka kontrolluar nëse ka mjete të mjaftueshme për t’i paguar faturat dhe për t’u kujdesur për djalin e vogël, shkruan “The Guardian”, transmeton Gazeta Express.