Edhe Ambasada e Shteteve të Bashkuara të Amerikës është larguar nga Bordi i Agjencisë Kosovare të Krahasimit dhe Verifikimit të Pronës për shkak se në krye të saj është zgjedhur para disa muajve Naser Shala, ish-komandant i UÇK’së të cilin ambasadat e huaja e konsiderojnë si të pakualifikuar.

Ambasadori amerikan në Kosovë, Philip Kosnett, ka bërë të ditur se sot është larguar nga Bordi i AKKVP, duke kujtuar një postim që ambasada e tij e kishte bërë ditën kur Shala u zgjodh në krye të këtij bordi.

“SHBA ka dhënë dorëheqje nga Bordi i Agjencisë Kosovare të Krahasimit dhe Verifikimit të Pronës, sikurse Britania e Madhe ka bërë më parë. Nuk do të vazhdojmë të jemi pjesëmarrës kur udhëheqja e saj u shërben interesave personale dhe politike më shumë se sa njerëzve. Përzgjedhja e miqëve të pakualifikuar në pozita qeverisës e lëndon imazhin e Kosovës dhe e tradhton besimin e publikut”, ka shkruar Kosnett në Twitter.

Më herët ambasadori ka kërkuar që të pakualifikuarit dhe ata që marrin pozita përmes nepotizmit dhe klientelizmit të largohen nga institucionet.

Një javë më parë Kosnett i kërkoi Shalës publikisht që të japë dorëheqje nga pozita që ka marrë muaj më parë.

Në Kuvendin e Kosovës në mars Naser Shala u zgjodh drejtor i Agjencisë për Verifikim të Pronës.

E për këtë emërim, në shenjë pakënaqësie, Ambasadori britanik në Kosovë, Ruari O’Connell, ka dhënë dorëheqje nga pozita e drejtorit të bordit të kësaj agjencie

Sipas O’Connell, Shala nuk i ka plotësuar kriteret e nevojshme për këtë pozitë udhëheqëse.

E këtë emërim, ambasadori britanik e ka quajtur si shkelje e Memorandumit të Mirëkuptimit në mes të Ambasadës së Britanisë dhe Kuvendit të Kosovës.