Arsenali është seriozisht i interesuar për sulmuesin e Aston Villas, Morgan Rogers, sipas gazetarit të BBC-së, Sam Mokbel.

Sipas raportimit, brenda klubit londinez po zhvillohen diskutime rreth mënyrës se si Rogers do të përshtatej në skuadër, duke pasur parasysh opsionet që Arsenali tashmë ka në pozitën e numrit 10.

Rogers ndodhet në listën e ngushtë të objektivave të Arsenalit së bashku me talentin e Bournemouthit, Eli Junior Kroupi, dhe sulmuesin e Atletico Madridit, Julián Alvarez.

Rogers dhe Kroupi pritet të kushtojnë mbi 80 milionë funte secili (rreth 92 milionë euro), ndërsa vlera e Julián Alvarez konsiderohet edhe më e lartë.

Trajneri Mikel Arteta ka luajtur një rol qendror në planifikimin e skuadrës për sezonin e ardhshëm, me Arsenalin që synon të transferojë një mesfushor qendror, një sulmues dhe një mbrojtës krahu gjatë afatit kalimtar veror.

Çdo lëvizje në merkato mund të lehtësohet nga largimet e mundshme në repartin ofensiv, pasi klubi është i hapur për oferta për Gabriel Jesus, Gabriel Martinelli dhe Leandro Trossard.

Arsenali po punon intensivisht për të forcuar skuadrën para sezonit të ri, me Morgan Rogers që shihet si një nga objektivat kryesorë të klubit londinez në merkaton e verës./Arbresh.info