“Avullohen” biletat në Mitrovicë, Trepça me përkrahje madhështore për finalen e Kupës

17:35 | 11 Shkurt 2025
D.H

Nesër luhet finalja e madhe e Kupës së Kosovës në basketboll midis Trepçës dhe Bashkimit.

Kjo sfidë do të luhet në “Pallatin e Rinisë dhe të Sporteve” në Prishtinë me fillim nga ora 19:00, shkruan Arbresh.info.

FBK ka ndarë nga 750 bileta për secilën klub. Trepça përmes një njoftimi të bërë në rrjetin social Facebook, ka bërë të ditur se të gjitha biletat janë shitur brenda 10 minutave.

“Të gjitha biletat e finales janë shitur! Federata e Basketbollit ka menaxhuar shitjen dhe organizimin. Nesër në finale, atmosfera pritet të jetë e zjarrtë! Na priftë e mbara”, shkruhet në njoftimin e klubit mitrovicas.

400 bileta janë servuar për publikun ndërsa 350 do t’i ketë tifogrupi “Torcida” që pritet të udhëtojnë drejt Prishtinës.

“Xehetarët” kërkojnë triumfin e katërt radhazi në Kupë, pas triumfit në Pejë, Rahovec dhe Gjakovë në tri vitet e fundit./Arbresh.info