Klubi austriak, LASK nga Linzi ka konfirmuar zyrtarisht transferimin e reprezentuesit të Kosovës, Art Smakaj nga Lokomotiva Zagrebi.

Smakaj ka bërë një hap tutje në karrierën e tij duke kompletuar transferimin nga futbolli kroat tek ai austriak.

Është vet faqja zyrtare e klubit LASK, e cila ka konfirmuar transferimin e Smakajt, i cili thuhet se i ka kushtuar 700 mijë euro.

“Reprezentuesi i Kosovës, Art Smakaj do të luajë për LASK-un në të ardhmen”.

“Mesfushori 22-vjeçar po transferohet nga klubi i divizionit të parë kroat Lokomotiva Zagreb te Linz dhe ka nënshkruar një kontratë deri në verën e vitit 2028”, thuhet në njoftimin e LASK-ut.

Ndryshe, Smakaj ishte një lojtar i padiskutueshëm titullar në Zagreb sezonin e kaluar, duke luajtur 32 nga 36 ndeshjet në Superligën e Kroacisë, duke luajtur titullar çdo herë.

22-vjeçari, i cili mund të luajë si në mesfushë mbrojtëse ashtu edhe në qendër të mbrojtjes, shënoi dy gola dhe dha pesë asistime.

Te LASK-u, Smakaj do ta takojë bashkëlojtarin nga Kombëtarja e Kosovës, Valon Berishën. /Telegrafi/